Du, was brännt-me pro Nacht
für en Kahn im Kreis acht,
s'il vous plaît, s'il vous plaît, s'il vous plaît?
Du, was isch de Betrag
für en grantige Schlag
grad am See, grad am See, grad am See?
Hesch, ich lach mir en Schranz
guet vo da uf Iilanz
i's Gilet, i's Gilet, i's Gilet!
Hesch, was söll dänn dä Krach
wägem Dach überem Dach
s'il vous plaît, s'il vous plaît, s'il vous plaît?
Chumm Brüeder, verhebs, chumm Schwöschter, chlemm ab, was brucht dänn en relativ normale Ziitgenoss mit-ere nanig abruch-honegger-riife Anatomie en eigeti Wohnig, e tüüri....?
Mys Dach isch de Himmel vo Züri
und s'Bellevue mys Bett, won ich pfuus!
Und d'Schipfi mys Bänkli
und d'Meise mys Schränkli
und Züri, ganz Züri mys Huus!
Mys Dach isch de Himmel vo Züri
und s'Bellevue mys Bett, won ich pfuus
und d‘Schipfi mys Bänkli
und d‘Meise mys Schränkli
und Züri, ganz Züri mys Huus!
Mys Dach isch de Himmel vo Züri
und s'Bellevue mys Bett, won-ich pfuus
und d‘Nachttischlatärne
de Mond mit de Stärne
und Züri, ganz Züri mys Huus!
Chumm Brüeder, verchlemms, chumm Schwöschter, stell ab! Spinnsch dänn Du?
Chrampfsch am Samschtig? Fahrsch geischtige deux-chvaux? Du, was häsch dänn scho, wänn dänn ändli Dyn Schlag entdäckt häsch wien e Guufe imene Heustock ine, he? Chumm, Schätzli, ich säg Dir's tätsch Marroni i’s Gsicht: Sorge häsch vo wäge de Irichtig, c‘est tout. Du, und gäll, ich cha Dir das nachefüühle biim hüttige Stand vom Mobelbau! Du ich han au schon emale uuf esone supermodärne Stromlinie-Couch wellen as Hüeneraug voll Schlaf näh...
Du, ich kenne das Gfühel
i de Wohnbedarf-Stüehl
s'il vous plaît, s'il vous plaît, s'il vous plaît!
Du, ich weiss wie’s eim isch
a de schwedische Tisch -
Windelweh, windelweh, windelweh!
Hesch, mich rüehrts ä de Bock
vor-em Pfischter-Barock
jemineh, jemineh, jemineh!
Hesch, was sott ich dänn nur
mit däm Chabis vo Suhr
s'il vous plaît, s'il vous plaît, s'il vous plaît?
Chumm, Brüeder, verhebs, chumm Schwöschter, stell ab, rüehr das Züüg i‘s Brockehuus oder schänks em Landesmuseum und mach‘s eso wien ich, ich hanämli für de wirkligi Heimetstil e ganz es bsunders Gspüri......
Mys Dach isch de Himmel vo Züri
und s'Bellevue mys Bett, won ich pfuus
und "d’Tat" mys Düvettli
und d'Limmet s‘Klosettli
und Züri, ganz Züri mys Huus!
Mys Dach isch de Himmel vo Züri
und s'Bellevue mys Bett won ich pfuus
und z'Nachtisch-Latärne
de Mond mit de Stärne
und Züri, ganz Züri mys Huus!
Text©Werner Wollenberger Nachlass
Werner Wollenberger schrieb das Mini-Musical Eusi chlii Stadt zur Eröffnung des Zürcher Theaters am Hechtplatz. Am 25. April 1959 kam der Bilderbogen in Prosa und Reimen mit einer Starbesetzung zur Uraufführung. Ironisch-satirische Szenen und Lieder über den Alltag in Zürich, der kleinen Grossstadt. Mit legendären Liedern wie «Mys Dach isch de Himmel vo Züri» wird der Tagesablauf in der kleinen Stadt erzählt.
